Page:Gospel of Saint John in West-Saxon.djvu/127

on ēow, biddað swā hwæt swā gē wyllon, and hyt byð ēower.^[1]

8. On ðām ys mīn Fæder geswutelod, þæt gē beron mycle blǣda, and bēon mīne leorningcnihtas.^[2]

9. And ic lufode ēow, swā Fæder lufode me: wuniað on mīnre lufe.

10. Gif gē mīne bebodu gehealdað, gē wuniað on mīnre lufe; swā ic gehēold mīnes Fæder bebodu, and ic wunige on hys lufe.^[3]

11. Đās þing ic ēow sǣde þæt mīn gefēa sȳ on ēow, and ēower gefēa sȳ gefulled.^[4]

Ðys [godspel] gebyrað tō þǣra apostola mæssedagon.

12. Ðis ys mīn bebod, þæt gē lufion ēow gemǣnelīce, swā ic ēow lufode.

13. Næfð nān man māran lufe þonne ðēos ys, þæt hwā sylle his līf for his frēondum.

14. Gē synt mīne frȳnd, gif gē dōð þā þing þe ic ēow bebēode.^[5]

15. Ne telle ic ēow tō ðēowan; for þām sē ðēowa nāt hwæt sē hlāford dēð. Ic tealde ēow tō frēondum; for þām ic cȳðde ēow ealle þā þing þe ic gehȳrde æt mīnum Fæder.^[6]

1. B, C, eowor.
2. A, and þæt ge beron mycele; B, C, bleda, A, bleda altered to blæda.
3. A, wunie.
4. A, B, C, gefylled.
5. A, synd; C, bebode.
6. Corp., hlafor; A, B, C, hlaford; C, cydde; A, mynon.