Page:Gospel of Saint John in West-Saxon.djvu/151

14. Đā hēo þās þing sǣde, þā bewende hēo hī on bæc, and geseah hwār se Hǣlend stōd, and hēo nyste þæt hyt sē Hǣlend wæs.^[1]

15. Đā cwæð sē Hǣlend tō hyre, Wīf, hwī wēpst ðū? hwæne sēcst þū? Hēo wēnde þæt hit sē wyrtweard wǣre, and cwæð tō him, Lēof, gif þū hine nāme, sege mē hwār þū hine lēdest, and ic hine nime.

16. Dā cwæð sē Hǣlend tō hyre, Maria. Hēo bewende hī, and cwæð tō him, Rabbōni; þæt ys gecweden Lārēow.

17. Đā cwæð sē Hǣlend tō hyre, Ne æthrīn þū mīn; nū gȳt ic ne āstāh tō mīnon Fæder. Gang tō mīnon brōþron, and sege him, Ic āstīge tō mīnon Fæder and tō ēowron Fæder, and tō mīnon Gode and tō ēowron Gode.^[2]

18. Đā cōm sēo Magdalenisce Maria, and cȳðde þām leorningcnihton and cwæð, Ic geseah Drihten; and þās þing hē mē sǣde.

Ðis godspel gebyrað seofon nyht ofer ēastron.

19. Đā hit wæs ǣfen, on ānon þǣra restedaga, and ðā dura wǣron belocene ðǣr þā leorningcnihtas wǣron gegaderode for ðǣra Iudea ege, sē Hǣlend cōm and stōd tōmiddes hyra, and cwæð tō him, Sī sibb mid ēow.^[3]

1. A, wæs se hælend (changed order).
2. A, git; A, mynum (four times); A, broðrum; A, eowrum (twice).
3. Corp., æuen, A, æfen; Corp., dure, A, dura; A, þar; A, heora.