29. Cumað and gesēoð þone man þe mē sǣde ealle [þā] þing þe ic dyde; cweðe gē is hē Crīst?[1]
3o. Đā ēodon hī ūt of ðǣre byrig, and cōmon tō him.
31. Ongemang þām his leorningcnihtas hine bǣdon, and þus cwǣdon, Lārēow, et.
32. Đā cwæð hē tō him, Ic hæbbe þone mete tō etanne þe gē nyton.[2]
33. Đā cwædon his leorningcnihtas him betwȳnan, Hwæðer ǣnig man him mete brōhte?[3]
34. Đā cwæð sē Hǣlend tō him, Mīn mete is þæt ic wyrce þæs willan ðe me sende, þæt ic fullfremme his weorc.
35. Hū ne secge gē þæt nū gȳt synt fēowur mōnðas ǣr man rīpan mæge? nū ic ēow secge, Hebbað ūpp ēowre ēagan, and gesēoð þās eardas þæt hig synt scīre tō rīpanne.[4]
36. And sē ðe rīpð nimð mēde, and gaderaþ wæstm on ēcum līfe, þæt ætgædere geblission sē þe sǣwþ and sē ðe rīpþ.
37. On þyson is witodlīce sōð word, for ðām ōþer is sē ðe sǣwþ, ōþer is sē ðe rīpþ.
38. Ic sende ēow tō rīpanne þæt þæt gē ne beswuncon; ōðre swuncon, and gē ēodun on hyra geswinc.[5]
